العمال والفلاحون يتحدثون: حقوقنا الاقتصادية في دستور الشغيلة

محمد جاد

فيه ناس بتقول إن الدستور ما يهمش المواطن العادي، لأن الخلاف علي مدنية الدولة قضية فرعية في حياة مواطن كادح كل اللي بيحلم بيه لقمة عيش كريمة. لكن الحقيقة أن الدستور “أبو القوانين”، والمباديء الاقتصادية اللي حيحددها الدستور الجاي هي اللي حتحكم كل القوانين اللي بتمس حياتنا اليومية اللي هاتطلع من مجلس الشعب. القانون نقدر نغيره، ومجلس الشعب حيتغير كل 4 سنين، لكن الحقوق الاقتصادية اللي حيقرها الدستور مابتتغيرش غير بعد عشرات السنين .

عشان كده مجموعة من النقابيين والناشطين السياسيين أطلقوا حملة لكتابة المواد المتعلقة بالحقوق الاقتصادية والاجتماعية، وعملوا أول اجتماع لهم  النهاردة. المجموعة دي فيها اتحاد النقابات المستقلة واتحاد الفلاحين، والمركز المصري للحقوق الاقتصادية والاجتماعية ولجنة الحق في العمل. والورش اللي حيعملوها علي مدار الشهور الجاية مفتوحة لانضمام أي حد عنده رأي في المواد الاقتصادية في الدستور الجديد.

وقبل ما نبتدي نفكر ايه المواد الاقتصادية اللي محتاجينها في دستورنا، لازم نعرف أن الدستور بيقر حقوق ومباديء أساسية ، ومابيدخلش في تفاصيل كيفية تطبيق الحقوق دي زي القوانين، لكنه بيمثل المرجعية اللي بتحكم القوانين دي. عشان كده لو كان الدستور مكتوب بروح العدالة، وكل المجتمع مشارك في صياغته وبيحمي مبادئه، بيقدر الشغيلة والفقرا يدافعوا عن حقوقهم قدام السلطة بشكل أقوي. المناضل علاء عبد الفتاح، قدم مثل علي أهمية مشاركة الشغيلة في كتابة الدستور، بتجربة جنوب أفريقيا، وحكى في افتتاح ورشة الجمعة إزاي كان فيه مبادرات من بعض السياسيين في جنوب أفريقيا لجمع آراء الناس حوالين الدستور من أيام الخمسينات وكتابة مباديء دستورية وفي الوقت ده كان الشعب بيعاني من استبداد الأقلية البيضاء. ولما الثورة انتصرت بعد 40 سنة، خرج الدستور بروح المباديء اللي أقرها الشعب، عشان كده كانت المحكمة الدستورية هناك بتنصف الفقرا. وفي مرة حاولت الحكومة تهد عشوائيات عشان تستغل الأرض بتاعتها، ولأن الدستور بيلزم الدولة بتوفير السكن لكل مواطن اضطرت الدولة توفر مساكن بديلة لسكان العشوائية. مش بس كده، أهالي المنطقة العشوائية اعترضوا وقالوا إن المساكن بعيدة عن شغلهم ومصالحهم، واتمسكوا بالبقاء في منطقتهم السكنية بعد تطويرها لأن الدستور بينص علي حق المواطن في التمتع بـ” الراحة”، ولما لجأوا للمحكمة الدستورية صدر حكم في صالحهم .

دا مثل علي أهمية أننا نشارك في صياغة حقوقنا في الدستور ، ونبادر بتقديمها للجنة التأسيسية للدستور ، ونوسع النقاش حواليها علشان يكون القطاع الاكبر في المجتمع علي وعي بيها ، ويدافع عن تطبيقها علي أرض الواقع .

أما عن تفاصيل الحقوق الاقتصادية اللي ناقشتها أول جلسة لورشة كتابة الدستور، فمن أهم الحقوق اللي اتكلم عليها الحضور الحق في العمل، بمعنى التزام الدولة بتوفير العمل لكل مواطن، وأنه ياخد فرصته من غير وسايط ويحصل علي أجر كريم، تتحقق فيه الكفاية والمساواة مع زملاءه اللي في وضع مشابه له. ولو عاوز يحتج يقدر يشكل نقابة، ويعمل اعتصام أو إضراب وفقا لأحكام القانون. ولو حصله ظرف سيء أو خرج علي المعاش يلاقي نظام أمان اجتماعي يوفرله الحياة الكريمة. وطبعا تكون فيه مساواة في الحقوق بين العامل والعاملة. ولو الدولة عجزت عن توفير فرصة العمل للمواطن يبقي المواطن له حق عند الحكومة، ياخده في صورة إعانة بطالة لحد ما يلاقي فرصة عمل.

الورشة ناقشت كمان حقوق الفلاح، واللي من أهمها طبعا الحق في الحصول علي الأرض، بمعني أولوية الحصول على الأراضي الجديدة لصغار الفلاحين، وإن كل الفلاحين يتمتعوا بحيازات آمنة، يعني تكون في حيازته قطعة أرض لفترة طويلة علشان يحس بالاستقرار. والحق في الحصول علي تكنولوجيا وتدريب وكمان مستلزمات إنتاج بأسعار معقولة، مش ياخد سماد مغشوش بسعر غالي من السوق السوداء.

في كلمته في افتتاح الورشة، نبه المناضل العمالي، كمال أبو عيطة، لأهمية وجود عقوبة رادعة للي حيخالف أحكام الدستور. وعشان يثبت أهمية العقوبة دي، قرأ علي الحضور عدد من حقوقنا الاقتصادية والاجتماعية اللي كانت موجودة في دستور 1971. وطبعا الناس ضحكت ، لأننا كلنا كنا حاسين إزاي ماكانتش سياسات الدولة بتعبر عن حقوقنا الاقتصادية ، زي حقوقنا في الحصول علي تعليم مجاني، واللي طبعا كنا بندفع تمنه في الدروس الخصوصية بسبب رداءة مستوى التعليم.

Advertisements

التصنيفات : تقرير, حركة اجتماعية

الكاتب:Al-harafeesh

A revolutionary socialist

لا توجد تعليقات حتى الأن.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   /  تغيير )

Google+ photo

أنت تعلق بإستخدام حساب Google+. تسجيل خروج   /  تغيير )

صورة تويتر

أنت تعلق بإستخدام حساب Twitter. تسجيل خروج   /  تغيير )

Facebook photo

أنت تعلق بإستخدام حساب Facebook. تسجيل خروج   /  تغيير )

w

Connecting to %s

%d مدونون معجبون بهذه: